By Arvie Jane Dacara 
Nanawagan si Pangulong Ferdinand R. Marcos Jr. sa mga bansa sa Asya at Pasipiko na lumikha ng isang pandaigdigang legal na balangkas para sa epektibong pag-iwas at pagtugon sa mga kalamidad at tiyaking protektado ang bawat indibidwal bago, habang, at pagkatapos ng mga sakuna.
Sa kanyang talumpati sa pagbubukas ng Asia-Pacific Ministerial Conference on Disaster Risk Reduction (APMCDRR) sa Philippine International Convention Center (PICC) sa Pasay, binigyang-diin ni Marcos na handa ang Pilipinas na pangunahan ang pagbuo ng isang pandaigdigang legal na instrumento para sa Protection of Persons in the Event of Disasters.
“Layunin nitong punan ang mga kritikal na kakulangan sa mga umiiral na batas ukol sa pagtugon sa kalamidad, itaguyod ang karapatan at dignidad ng mga apektadong tao, linawin ang mga responsibilidad, at pagbutihin ang koordinasyon ng mga humanitarian efforts,” ani Marcos.
Ang kumperensiya, na una sa kasaysayan ng Pilipinas, ay gaganapin mula Oktubre 14 hanggang 18. Dumalo rito ang mga kinatawan mula sa mga gobyerno, civil society organizations, pribadong sektor, siyentipikong komunidad, akademya, at iba’t ibang stakeholder upang palakasin ang pagtutulungan para sa disaster resilience at risk reduction sa rehiyon ng Asya-Pasipiko.
Aabot sa 4,000 delegado mula sa 70 bansa ang nagtipon sa Manila upang bigyang-diin ang kahalagahan ng kooperasyon para sa isang ligtas at matatag na kinabukasan para sa lahat.
Pilipinas bilang “Climate Champion”
Binanggit din ni Marcos ang kahandaan ng Pilipinas na maging host ng Loss and Damage Fund Board, isang pandaigdigang mekanismo para sa pondo na tutulong sa mga bansang pinakaapektado ng climate change.
“Ito ay nagpapatibay ng ating pangako na gawing maayos ang operasyon ng Board at maging bahagi ng tagumpay ng institusyonal na balangkas nito,” ani Marcos. “Umaasa kami na ang pondo ay direktang makikinabang sa mga bansang lubos na naaapektuhan ng pagbabago ng klima, lalo na sa ating rehiyon.”
Binigyang-diin din niya ang malawak na karanasan ng Pilipinas sa pagtugon sa mga kalamidad dahil sa lokasyon nito at pagiging bulnerable sa climate change—isang hamon na kinakaharap din ng ibang bansa sa Asya-Pasipiko.
“Dapat nating pagsikapang likhain ang isang kinabukasan kung saan mas bibihira ang pangangailangan para sa recovery dahil mas magiging ligtas, handa, at matatag sa kalamidad ang ating rehiyon,” dagdag pa niya.
Ibinahagi rin ni Marcos ang ilang hakbang upang pangunahan ng Asya-Pasipiko ang global na pagsusumikap sa disaster risk reduction at pagbuo ng mga sustainable economies. Kabilang dito ang pagpapalakas ng disaster investments, pagsuporta sa inclusivity at innovation, pagpapalawak ng koordinasyon at pakikipagtulungan, at pagtataguyod ng bukas na diyalogo sa pagitan ng mga pangunahing partner at stakeholder.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos