By Arvie Jane Dacara 
Inanunsyo ng Malacañang ang suspensyon ng trabaho sa mga ahensya ng gobyerno sa National Capital Region ngayong Lunes dahil sa masamang panahon dulot ng Bagyong “Enteng.” Epektibo ang suspensyon simula 8:30 a.m., ayon sa pahayag ng Office of the Executive Secretary.
“Ipinauubaya naman sa mga pinuno ng mga pribadong kumpanya at tanggapan ang desisyon kung magsususpinde sila ng trabaho,” dagdag pa sa pahayag.
Nauna nang sinuspinde ng Palasyo ang klase sa lahat ng antas sa Metro Manila dahil din sa malakas na ulan na dala ng Bagyong Enteng, na siyang ikalimang bagyo ng bansa ngayong taon.
Maraming lugar sa Luzon, kabilang na ang Metro Manila, ang nasa ilalim ng Tropical Cyclone Wind Signal (TCWS) No. 2 simula 8 a.m. Kaninang umaga, huling namataan si Enteng sa mga baybayin ng Vinzons, Camarines Norte, na may dalang pinakamataas na hangin na 75 kilometro kada oras at pagbugsong aabot ng 90 kph.
Samantala, sinuspinde rin ng Metropolitan Manila Development Authority (MMDA) ang number coding scheme sa rehiyon.
Ang antas ng tubig sa Marikina River ay umabot na sa 16.8 metro (second alarm) simula 9:10 a.m. matapos ang walang tigil na pag-ulan simula pa kagabi. Isa ang Marikina City sa mga pinaka-apektadong lugar noong tumama ang super typhoon Carina noong Hulyo 24, na nagdulot ng pag-apaw ng ilog at pagbaha sa ilang barangay.
Nagdeklara rin ng suspensyon ng trabaho ang Senado. “Dahil sa hindi magandang lagay ng panahon dulot ng Bagyong Enteng, idineklara ni Senate President Francis ‘Chiz’ Escudero ang suspensyon ng trabaho sa Senado ngayong Lunes, 2 Setyembre 2024. Magpapatuloy ang sesyon bukas, Martes, 3 Setyembre 2024, sa ganap na 3:00 p.m.,” ayon sa anunsyo ni Senate Secretary Renato Bantug Jr.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts: Facebook, YouTube, X, TikTok, Instagram, Threads.
Kenneth Marcos