By Arvie Jane Dacara 
Inihayag ng Commission on Elections (Comelec) nitong Lunes na mahigit kalahating milyong aplikasyon para sa reactivation ng botante ang kanilang naproseso mula Pebrero 12 hanggang Setyembre 11.
Batay sa pinakahuling datos ng Comelec, umabot sa 556,231 ang natanggap na aplikasyon para sa reactivation. Sa kabuuang bilang na ito, 342,991 ang humiling ng reactivation ng kanilang voter registration, habang 102,410 ang nag-apply para sa reactivation kasama ang pagwawasto ng mga entry. Samantala, 81,649 katao ang nag-aplay para sa transfer na may kasamang reactivation.
May kabuuang 29,181 aplikante ang nag-apply para sa transfer na may kasamang reactivation at pagwawasto ng mga entry. Ang kabuuang bilang ng aplikasyon para sa reactivation ay kumakatawan sa 10% lamang ng mga deactivated na voter registration records.
Ayon sa pinakahuling datos, nasa 5,376,630 na botante ang may deactivated na records, kung saan karamihan o 5,371,376 ay dahil sa kabiguan nilang makaboto sa dalawang magkasunod na eleksyon. Bukod dito, 4,212 na botante ang na-deactivate dahil sa mga exclusion order mula sa mga hukuman, at 1,004 naman ang hindi nakapag-validate ng kanilang records.
Bukod sa reactivation, tinatanggap din sa kasalukuyang voter registration ang aplikasyon para sa transfer, pagbabago o pagwawasto ng mga entry sa registration records, inclusion ng registration records, reinstatement ng pangalan sa listahan ng botante, at transfer ng registration mula sa foreign service post papunta sa lokal na presinto.
Ang voter registration para sa 2025 midterm elections ay tatakbo hanggang Setyembre 30, 2024.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin aming mga social media accounts:
Kenneth Marcos