By Arvie Jane Dacara 
Pangulo, Binibigyan pa ng Pagkakataon ang mga Ulo ng Ahensya na Patunayan ang Sarili sa Gitna ng Mass Resignation Call
MANILA — Nilinaw ng Malacañang nitong Huwebes na mananatili sa puwesto ang lahat ng pinuno ng mga ahensya at opisina ng pamahalaan habang patuloy ang pagsusuri sa kanilang performance, kasunod ng direktiba ni Pangulong Ferdinand R. Marcos Jr. na magsumite ng courtesy resignation ang mga ito.
Ayon kay Presidential Communications Office Undersecretary at Palace Press Officer Claire Castro, ito na raw ang tamang pagkakataon para ipakita ng mga opisyal na karapat-dapat silang manatili sa kanilang posisyon.
“Mananatili sila sa kani-kanilang pwesto. Siguro ito na ang tamang panahon para patunayan nila na sila’y nararapat sa kanilang tungkulin,” pahayag ni Castro sa isang press briefing.
Ngunit malinaw ang babala mula sa Palasyo: “Kapag nakita ng Pangulo na hindi ka karapat-dapat sa iyong puwesto, aalis ka.”
Sakop ng direktibang ito ang mga kalihim ng gabinete, mga pinuno ng mga ahensyang may cabinet rank, mga presidential advisers at assistants.
Ibinunyag din ni Castro na ipinahayag ni Marcos ang kanyang pagkadismaya sa naging performance ng ilang miyembro ng gabinete, lalo na matapos ang hindi pag-abot sa target na tagumpay ng administration-backed Senate slate sa katatapos lamang na halalan noong Mayo 12.
“Aminado ang Pangulo na maaaring hindi sapat sa mata ng publiko ang naging takbo ng pamahalaan kaya hindi nakuha ang target na bilang sa Senado,” ani Castro, patungkol sa target na 11-0 sweep ng Alyansa Para sa Bagong Pilipinas.
Dagdag pa niya, hindi rason ang pagkatalo para hindi ayusin ang pamahalaan. Mas lalo pa raw dapat pabilisin ang galaw ng administrasyon upang maipakita sa publiko ang tunay na malasakit.
Bukod sa pagsusuri ng performance, layunin din ng proseso na matukoy kung may sangkot sa katiwalian sa pamumuno ng bawat ahensya.
“Mas mabibigyang-diin din sa review kung may mga iregularidad sa pamamalakad ng kanilang tanggapan,” sabi ni Castro.
Mas maaga rin ngayong araw, opisyal na inianunsyo ng Palasyo ang pag-uutos ni Pangulong Marcos sa lahat ng Cabinet secretaries na magsumite ng kanilang courtesy resignation — isang matapang na hakbang upang muling ayusin ang direksyon ng pamahalaan matapos ang resulta ng midterm elections.
Karamihan sa mga miyembro ng gabinete ay agad na sumunod sa kautusan ng Pangulo.
Laging nakatutok sa Pwersa Balita para sa mga balita na dapat mong malaman kami ang Pwersa Balita! Bisitahin rin aming mga social media accounts:
https://www.facebook.com/PwersaBalita/
www.youtube.com/@pwersabalita
https://x.com/PwersaBalita
https://www.tiktok.com/@pwersabalita
https://www.instagram.com/pwersabalita/
https://www.threads.net/@pwersabalita
Kenneth Marcos