By Arvie Jane Dacara 
Inanunsyo ng Department of Public Works and Highways (DPWH) nitong Martes na natapos na ang pagkumpuni sa nasirang asphalt overlay ng Panguil Bay Bridge sa Mindanao.
Ayon kay DPWH Senior Undersecretary Emil Sadain, “Ang pagkukumpuni sa asphalt overlay na nasira dahil sa sobrang bigat ng mga sasakyan ay ganap nang natapos kahapon (Lunes) bandang 5:00 ng hapon.”
Binuksan na ang tulay para sa mga motorista noong Lunes ng gabi bandang 9:00 ng gabi upang maibalik ang normal na daloy ng trapiko.
Ang emergency repair ay sinimulan noong Disyembre 1 at tumutok sa sirang bahagi ng asphalt pavement ng tulay sa direksyong Tangub City papunta sa Tubod. Ang Panguil Bay Bridge, na may haba na 3.17 kilometro, ang pinakamahabang tulay sa rehiyon.
Nilinaw ng DPWH na ang sira sa asphalt pavement ay hindi nakaapekto sa structural integrity ng tulay. Batay sa pagsusuri ng DPWH at ng project consultant na Yooshin-Pyunghwa-Kyongho JV, ang mga depekto ay dulot ng mga trak na sobra sa 30-ton design capacity ng tulay.
Upang matiyak ang pangmatagalang kalidad, inatasan ng DPWH ang contractor na maghanda ng isang komprehensibong plano para sa pagkukumpuni. Kasama rito ang revised asphalt mix design at waterproofing measures upang mapaganda ang buong asphalt pavement.
Ang Panguil Bay Bridge, na nag-uugnay sa Tangub City, Misamis Occidental, at Tubod, Lanao del Norte, ay opisyal na binuksan noong Setyembre 27.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita! Bisitahin rin ang aming mga social media accounts:
Kenneth Marcos