By Arvie Jane Dacara 
Ang batikang mamamahayag na si Fernando Sanga, na mas kilala bilang Dindo Amparo, ay pormal na nanumpa bilang bagong direktor ng Presidential Broadcast Service – Bureau of Broadcast Services (PBS-BBS) nitong Miyerkules. Si Sanga ay nanumpa sa harap ni Communications Secretary Cesar Chavez, kasabay ng turnover ceremony kasama ang dating hepe ng PBS-BBS na si Rizal Giovanni Aportadera, ayon sa pahayag na inilabas ng Presidential News Desk (PND) nitong Huwebes.
Ibinahagi rin ng PND ang ilang mga larawan ng seremonya ng panunumpa ni Sanga. Sa kasalukuyan, ang PBS-BBS ay nagmamay-ari at nagpapatakbo ng iba’t ibang mga istasyon ng radyo sa buong bansa, kung saan ang DZRB Radyo Pilipinas Manila ang pangunahing istasyon nito.
Sinimulan ni Sanga ang kanyang karera sa media noong 1987 bilang reporter ng DZRB sa Lucena. Nagsilbi rin siya bilang development information officer sa Philippine Information Agency mula 1987 hanggang 1989 at announcer-reporter sa PBS-BBS mula 1989 hanggang 1994.
Noong 1994, sumali si Sanga sa ABS-CBN bilang reporter, kung saan nagtagal siya hanggang 2005. Kinalaunan, siya ay itinalaga bilang bureau chief ng ABS-CBN sa Dubai mula 2005 hanggang 2010. Sa kanyang pagbabalik sa Pilipinas, hinawakan niya ang posisyon bilang head of news gathering at assistant vice president ng ABS-CBN.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos