By Arvie Jane Dacara 
Bumaba ang bilang ng mga barkong Tsino na namataan sa iba’t ibang bahagi ng West Philippine Sea (WPS), ayon sa ulat ng Philippine Navy (PN) nitong Martes. Ayon sa pinakahuling monitoring, 157 barkong Tsino ang namataan mula Setyembre 10 hanggang 16, mas mababa kumpara sa 207 barko na naitala mula Setyembre 3 hanggang 9.
Sa kabuuang bilang na ito, 123 ay mga Chinese Maritime Militia Vessels (CMMVs), 26 ay China Coast Guard Vessels (CCGVs), pitong warships mula sa People’s Liberation Army Navy (PLAN), at isang Chinese Research and Survey Vessel (CRSV).
Pinakamarami ang mga barko sa Sabina Shoal, kung saan namataan ang 65 barko – 52 CMMVs, apat na barko ng PLAN, at siyam na CCGVs. Umalis na rin kamakailan ang pinakamalaking barko ng Philippine Coast Guard, ang BRP Teresa Magbanua, matapos ang limang buwang deployment sa Sabina Shoal mula noong Abril 15.
Samantala, 32 barko ng Tsina ang namataan sa Pagasa Island – 31 CMMVs at isang CCGV. Mayroon ding 18 barko sa Bajo de Masinloc – walong CMMVs, anim na CCGVs, tatlong barko ng PLAN, at isang CRSV. Sa Ayungin Shoal naman, nakita ang 17 barko – 10 CCGVs at pitong CMMVs, habang 17 CMMVs ang namataan sa Iroquois Reef.
Sa Lawak at Panata Islands, may walong CMMVs na namataan.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin aming mga social media accounts:
Kenneth Marcos