By Arvie Jane Dacara 
Nanawagan si Pangulong Ferdinand R. Marcos Jr. para sa mas agresibong aksyon laban sa kanser, na kasalukuyang ikalawang pangunahing sanhi ng pagkamatay sa Pilipinas. Ginawa niya ang pahayag sa groundbreaking ng Bagong Pilipinas Cancer Care Center ng Overseas Filipino Workers (OFW) Hospital sa Lungsod ng San Fernando, Pampanga.
“Simula Enero hanggang Mayo ngayong taon, ang Philippine Statistics Authority ay nagtala ng kanser bilang ikalawang nangungunang sanhi ng pagkamatay sa bansa,” ani Marcos. “Kailangan nating maging kasing-agresibo sa pagbibigay ng paggamot tulad ng pag-atake ng sakit na ito – upang magbigay ng pag-asa, kalinga, at malasakit sa ating mga pasyente sa panahong pinakakailangan nila ito.”
Ang ikalawang palapag ng ospital ay ilalaan para sa Bagong Pilipinas Cancer Care Center. Gayunpaman, inamin ng Pangulo na malaki pa ang kailangang gawin upang matiyak na ang pasilidad na ito ay magiging handa at sapat para sa mga nangangailangan.
Pinuri rin niya ang Department of Health (DOH) sa Health Facility Enhancement Program nito na nagbigay-daan upang maisakatuparan ang proyektong ito. Umaasa ang Pangulo na ang bagong pasilidad at mga kinakailangang kagamitan ay agad na makukumpleto.
Nagbigay din siya ng pagkilala kay yumaong Department of Migrant Workers (DMW) Secretary Susan Ople, na nagsilbing inspirasyon sa pagtatayo ng bagong cancer care facility. Ayon kay Marcos, ang dedikasyon ni Ople para sa kapakanan ng mga OFW ay magpapatuloy na gumabay sa mga Pilipino.
“Para sa ating mga minamahal na OFWs, ang pasilidad na ito ay para sa inyo at inyong mga pamilya. Bagamat hindi natin hangad na magamit ninyo ito, mas makakahinga tayo nang maluwag kung alam nating may ospital kayong matatakbuhan sa oras ng pangangailangan,” dagdag niya.
Ang OFW Hospital, na pinasinayaan noong 2022, ay ang kauna-unahang ospital sa Pilipinas na nag-aalok ng kumpletong serbisyong medikal para sa mga OFW at kanilang mga dependent. Bukod sa cancer care, inaasahang magkakaroon din ito ng hemodialysis unit upang mas matugunan ang mga pangangailangan ng komunidad ng OFW.
Laging nakatutok sa Pwersa Balita para sa mga balita na dapat mong malaman. Kami ang Pwersa Balita! Bisitahin rin ang aming mga social media accounts:
Kenneth Marcos