By Arvie Jane Dacara 
Patuloy na pinag-aaralan ni Pangulong Ferdinand R. Marcos Jr. ang panukalang bigyan ng pagkamamamayan ang negosyanteng Tsino na si Li Duan Wang, ayon sa pahayag ng Malacañang noong Martes.
Sinabi ni Presidential Communications Office Undersecretary Claire Castro na may tatlong araw pa si Pangulong Marcos upang magdesisyon hinggil sa legislative naturalization ni Wang.
“Sa ngayon po ay pinag-aaralan ng Pangulo ang patungkol dito sa legislative naturalization ni Li Duan Wang,” pahayag ni Castro sa mga mamamahayag sa Palasyo. “Hintayin po natin ang magiging desisyon ng Pangulo,” dagdag niya.
Si Wang, na kilala rin bilang Mark Ong, ay inaakusahan ng pagkakaroon ng koneksyon sa mga operasyon ng Philippine Offshore Gaming Operators (POGO) at may mga isyu tungkol sa kanyang personal na rekord.
Noong Enero 2025, tinutulan ni Senadora Risa Hontiveros ang aplikasyon ni Wang na maging Filipino citizen, at nagbigay ng mga ebidensya na nag-uugnay kay Wang kay Duanren Wu, isang fugitive na hinahanap sa China at sinasabing mastermind ng isang POGO hub sa Porac, Pampanga.
Ayon kay Hontiveros, si Wang din ang nagpapatakbo ng 9 Dynasty junket group, na may mga kasamang opisyal mula sa Rivendell, isang POGO hub sa Pasay na sangkot sa mga illegal na aktibidad. Hindi umano ito inilahad ni Wang sa kanyang aplikasyon.
Gayunpaman, noong Enero, ipinagtanggol ni Senador Sherwin Gatchalian ang Senado sa kanilang pagpapasa ng isang batas na magbibigay kay Wang ng Filipino citizenship, na nagsasabing nakumpleto ni Wang ang lahat ng mga legal na kinakailangan at wala siyang derogatory records.
Laging nakatutok sa Pwersa Balita para sa mga balita na dapat mong malaman! Kami ang Pwersa Balita!
Bisitahin rin aming mga social media accounts:
Facebook | YouTube | X | TikTok | Instagram | Threads
Kenneth Marcos